ఏపీలో ఎన్డీయే పార్టీల ప్రచారంలో భాగంగా ప్రధాని మోడీ రాష్ట్రానికి రానున్నారు. అయితే ప్రధాని పర్యటన షెడ్యూల్ లో మార్పులు చోటు చేసుకున్నాయి. రాష్ట్రంలో ప్రధాని తన ప్రచారంలో భాగంగా నాలుగు బహిరంగ సభల్లో పాల్గొనాలని నిర్ణయించారు. ఈ మేరకు ప్రధాని కార్యాలయం కూడా షెడ్యూల్ ఖరారు చేసింది. అయితే ఇప్పుడు ఈ షెడ్యూల్ లో మార్పులు చోటు చేసుకున్నాయి. అయితే అధికారికంగా ప్రకటన వెలువడాల్సి ఉంది.
రాష్ట్రంలో ఇప్పటికే ప్రకటించిన షెడ్యూల్ మేరకు ప్రధాని మోడీ వచ్చే నెల 3, 4 తేదీల్లో నాలుగు బహిరంగ సభల్లో పాల్గొనాల్సి ఉంది. విజయవాడ, అనకాపల్లి, రాజమండ్రి, పీలేరు సభల్లో ప్రధాని పాల్గొనాల్సి ఉంది. అయితే ఇప్పుడు మారిన షెడ్యూల్ ప్రకారం వచ్చే నెల 7, 8 తేదీల్లో ప్రధాని మోడీ రాష్ట్రంలో పర్యటించబోతున్నారు. ఉత్తరాది రాష్ట్రాల్లో జరుగుతున్న లోక్ సభ ఎన్నికల ప్రచారంలో బిజీగా ఉన్న మోడీ.. రాష్ట్రంలో ఈ మేరకు తన షెడ్యూల్ లో మార్పులు చేసినట్లు తెలుస్తోంది.
ఎన్డీయే కూటమి ఏర్పాటు అయ్యాక రాష్ట్రంలో ఇప్పటికే ఓసారి ప్రధాని మోడీ పర్యటించారు. పల్నాడులోని చిలకలూరిపేట వద్ద జరిగిన ఎన్డీయే కూటమి సభలో ప్రధాని మోడీ పాల్గొన్నారు. ఆ తర్వాత మళ్లీ కనిపించలేదు. ఇప్పుడు మే 7,8 తేదీల్లో సభలు నిర్వహించడం ద్వారా ఎన్నికల పోలింగ్ తేదీ కంటే ముందే ప్రచారం చేయాలని మోడీ భావిస్తున్నట్లు తెలుస్తోంది. అదే సమయంలో ఉత్తరాదిలో కూడా ప్రధాన రాష్ట్రాల్లో పోలింగ్ ముగియనుంది.
